ALBAY – Base sa 2022 Census of Agriculture and Fisheries kan Philippine Statistics Authority (PSA), nagbaba an bilang kan mga kabataang parasira sa Pilipinas. Hale sa 1.05 milyon kan 2012, nagbaba ini sa 1.03 milyon sa 2022, na nagpapahiling kan luway-luway na paglihis kan mga kabataan sa tradisyunal na agrikultura tanganing maghanap nin alternatibong kabuhayan.

Segun sa PSA, posible an pagbabago ini bilang epekto kan mas dakul na kabataan na nagpipili mag-escuela ngunian o maglaog sa mas halangkaw na income-generating sectors siring kan retail, manufacturing, asin serbisyo.

Para kay Diday Co, kandidata para bise gobernador kan Albay, magayon na suportahan an mga pagbabagong ini sa paagi nin mga lokal na lehislasyon na magpapakusog kan sektor pang-edukasyon asin skills training para sa kabataan. Ini an tulos niyang ibubusol tanganing masigurado na an mga kabataan kan Albay nagiging preparado para sa mas halangkaw na oportunidad na maghatod nin progreso sa satuyang probinsya.

Segun saiya, “Magayon na balikan asin pakusogon an mga programang pang-edukasyon na enot nang pinagbusol ni Congressman Joey Salceda kan siya gobernador kan Albay.”

Sinabi niya man na an Albay Higher Education Contribution Scheme (AHECS) na linunsar ni Salceda nagin instrumento sa pag-adal nin 77,137 na estudyante sa Albay, kasabay kan Education Quality for Albayanos (EQUAL) program para sa mga high school students. Ini an nagtao nin dakulang kontribusyon sa pagtaas kan performance kan mga estudyante sa National Achievement Test (NAT) hale sa 177th place kan 2007, nagsakat sa 19th place kan 2012.

Segun kay Co, an vision kan tandem ninda ni Salceda iyo an pagkua nin sarong college graduate kada pamilya Albayano, tanganing magtao nin oportunidad asin pag-asa sa gabos. Plano niya man na mapakusog an partnership kan provincial government sa TESDA, tanganing mas palawigon an skills development training para sa mga out-of-school youth asin mga young adult na naghahanap nin marhay na trabaho na may maayos na income.

“Sa paagi kan pagpakusog kan edukasyon asin training programs, makakabuo kita nin progresibong Albay na may kabataang preparado asin kompetitibo sa satuyang nasyon,” pahayag ni Co.